喺我三年班嘅時候作過一篇文章我好記得嘅,
題材係《爸爸的手》。
我讀小學嘅年代, 爸爸返早班6點至下午2點, 而媽媽返中午12點至晚上10點++。
小學嘅時候我係讀上午班, 所以午飯晚餐都係由爸爸照顧我, 同爸爸相處時間比較多, 感情自然會特別深。
爸爸以前係一個綠線小巴司機, 1車養起4家人, 有嫲嫲一家, 婆婆一家, 表姐一家, 仲有我們“咱們家”。
以前嘅小巴旁邊會有一個單坐位, 就好似私家車咁, 當然比私家車隔得開啲。
每逢1230放學嘅時候, 我就會好期待, 好開心咁跑去車站度等爸爸架小巴黎接我, 而爸爸會喺差不多嘅時候, 放一叠報紙喺“私家位”度霸住俾我放學上車遊車河。
新蒲崗-黃大仙/新蒲崗-慈雲山, 我鐘意後者多啲, 因為路程長啲, 而且有大斜坡, 有離心力又刺激, 仲會經過好多中學, 有好多靚哥哥靚姐姐望。
生面口的, 熟面口的, 一上一落, 來來回回, 除左睇“風景”, 我就係會瞓覺。
短短幾年嘅遊車河生涯, 自升上中學之後, 就只能成為回憶, 亦都冇再搭過新蒲崗至慈雲山線, 小巴亦都冇左私家位, 爸爸做左老闆, 都冇再揸小巴。
成日話工作好忙, 成日話要實現夢想, 成日話要進修, 成日話... 等爸爸下年退休之後要爸爸媽媽享受生活, 帶佢哋周遊列國, 成日話... ...。
"得個講字!", 成日比媽媽(寸)呢句說話, 我知錯喇!
自從2月發現爸爸患上左膽囊癌末期, 我個心就好似比刀割一樣好痛, 好痛好痛。
但我知道一定要堅強, 我要去照顧好爸爸, 去支持爸爸, 去陪爸爸行呢一段路, 呢場仗一定會贏!
<愛要及時, 別愛得太遲>
