2014年9月8號上午約六時四十分 (農曆八月十五) 爸爸離開左咱們家去了天國。
先講講我的名字--呂以（嫦）嘅由來：
我有3個家姐同1個哥哥, 名都係由媽媽改的, 生到第4個家姐時媽媽取其名叫
以（婷）, 意思即是-好停喇！唔再生喇。
就算做好避孕措施似乎都阻止唔到我嘅出現, 初初家庭醫生為我媽媽檢查時誤診我係膽石, 到後來發現係一個小生命時, 曾經考慮過人工流產, 嫲嫲就同媽媽講： 不如生個仔仔陪阿哥玩啦！ 最終手指救左我一命……出世時媽媽叫爸爸幫我改名, 因為佢改左（婷）都停唔到唔想再改, 爸爸心想: 希望囡囡好似嫦娥噤靚 [唔知點解爸爸會認為嫦娥係一名美女！？] 所以取名為以嫦, 當然大個左我有多謝爸爸冇幫我取名為娥, 正所謂～以以娥娥, 聽起來都覺得煩。所以每年嘅中秋節, 我都會唸起呢件事。
二月發現爸爸患上膽囊癌第四期, 醫生估計爸爸只有約三個月到半年嘅日子, 爸爸好叻, 捱過了六個半月。往年做節我們家都慣性提早節日前的星期六或日, 今年中秋都唔例外, 星期六預訂了盆菜, 一家大細喺屋企渡過, 呢張全家幅, 多珍貴。
到了星期日爸爸狀況急轉直下…… 當天爸爸每隔一段時間都會問我：“而家幾點？” 到了晚上約十點, 爸爸開始說話模糊, 眼光有點呆滯, 我和家姐們開始擔心打算送爸爸入院, 問爸爸：“爸爸, 你呢兩日都冇乜食野, 不如入醫院打營養素, 等狀態好啲先返屋企好嗎？” 爸爸好清晰咁講左句：“唔去！” 入夜後爸爸開始不安定地發出微弱的叫喊聲, 但都不忘望着鬧鐘的時間, 身體亦左右不停地反動著, 我們幾姊妹可以做的就只有拖住爸爸的手：“爸爸, 唔好驚！我哋會陪住你, 唔好驚……”過左十二點半, 爸爸終於瞓著了。正打算早上可以送爸爸入仁安醫院, 0015, 0100, 0445, 都幫爸爸量過血壓, 數字顯示都係穩定的, 直到做護士的家姐喺0630幫爸爸量血壓時見到血壓偏低, 急忙叫醒所有人準備出發去醫院, 0640救護車未到, 爸爸就喺睡夢中離開左咱們家。
點解？點解爸爸要不斷望住時間問住時間？ 我心目中的爸爸係一個心思細密, 文靜而又堅強, 正能量滿滿的大好人。從不投訴與發怒, 往往只為人設想的, 就連患病的日子裡, 爸爸都會重複的提點著我 ：“唔駛成日返黎睇爸爸, 爸爸知你乖, 要記得有足夠休息, 處理好工作, 爸爸愛妳！” 能夠擁有一個這麼懂得愛, 這麼懂得付出的爸爸多幸福！爸爸, 我都好愛好愛你。但...是你刻意支撐到中秋節正日才離開的嗎？
呢兩天上網查閱一下關於中秋節的傳說, 其中一個： 【中國人相信祈求月神的保佑，可以使全家團圓吉祥，因此中秋節要吃月餅，月餅就是象徵團圓。除了月餅，中秋節還吃柚子，因為「柚」與「佑」諧音，也是希望月亮護佑的意思。中秋節這一天到處都有人賞月，這一天的月亮是一年中最美的，情侶也喜歡在這一天約會，以祈求「月圓人圓」。中秋節的氣氛是寧靜、優美的，與其他熱鬧的節慶有很大的不同。】 爸爸, 相信你的心意係想我們用最平和, 最寧靜的心情去面對你的離開, 你要[咱們家]知道每年的中秋節正日要一家人團團圓圓就如與爸爸你同在, 不要哭哭啼啼, 因為你永遠都會活喺我們每一個人的心裡面, 帶着一份祝福。爸爸, 一路好走！我們會好好活下去。永遠懷念你的細女-以嫦
